Ambasadorja amerikane, Yuri Kim ka zhvilluar një takim me deputeten e PD, Jorida Tabakun në ambientet e Kryesisë së Kuvendit. Ka qenë deputetja Tabaku e cila ka reaguar në rrjetet sociale dhe ka zbuluar se çfarë ka biseduar me ambasadoren amerikane.
“Sot diskutova me ambasadoren amerikane prioritetet e procesit të integrimit europian, rëndësinë e përfshirjes së institucioneve. S’ka rrugë tjetër veç përmbushjes së kushteve për të sjellë ndryshimin: Lufta korrupsionit, krimit të organizuar; zgjedhjet e lira dhe të ndershme duhet të jenë kryefjala e politikës! Gjithashtu fokus të veçantë me ambasadoren morën dhe shqetësimet e opozitës dhe ekspertëve të pavarur mbi nismat e fundit qeveritare si: Amnistia Fiskale, Pasaportat e Arta, legalizimi kanabisit që nuk janë projekte nën frymën e integrimit ndaj i duhet thënë stop! E angazhuar për të mbikqyrur dhe kontrolluar punën e qeverisë në këtë proces; duhet ndryshuar mentaliteti administratës publike! I bëj thirrje qeverisë ta përdorë procesin e integrimit si një mënyrë për tërheqjen e mijërave të rinjve të talentuar që janë larguar nga Shqipëria”, shkroi deputetja Tabaku pas takimit.
Ky nuk është takimi i parë i Kim me Tabakun. Ato u takuan edhe kur u publikua raporti i inteligjencës amerikane për financim rus të PD në vitin 2017 për çështjen e lobimit në SHBA, kohë në të cilën kryetar i partisë ishte Lulzim Basha./