Ka lëvizje intensive diplomatike në Zvicër, ku po shqyrtohet mundësia e rifillimit të bisedimeve mes Shteteve të Bashkuara dhe Iranit për programin bërthamor të Teheranit.
Zhvillimet e fundit në Lindjen e Mesme po ndikojnë drejtpërdrejt edhe në përpjekjet diplomatike për rifillimin e negociatave bërthamore mes Shteteve të Bashkuara dhe Iranit. Bisedimet, të cilat ishin parashikuar të nisnin të premten në Zvicër, janë shtyrë për shkak të përshkallëzimit të konfliktit mes Izraelit dhe Hezbollahut në Liban, ndërsa ende nuk është caktuar një datë e re për zhvillimin e tyre.
Sipas raportimeve ndërkombëtare, i dërguari special i Shtëpisë së Bardhë është nisur drejt Zvicrës, ndërsa në rajon ndodhet edhe një nga bashkëpunëtorët më të afërt të Presidentit Donald Trump. Një rol të rëndësishëm në procesin diplomatik pritet të luajë edhe Katari, i cili prej kohësh shërben si ndërmjetës në kontaktet mes Uashingtonit dhe Teheranit.
Ndërkohë, Izraeli dhe Hezbollahu kanë rënë dakord për një armëpushim pas ditësh përplasjesh të ashpra. Sipas autoriteteve libaneze, bombardimet izraelite kanë shkaktuar dhjetëra viktima dhe mbi njëqind të plagosur, ndërsa ushtria izraelite ka raportuar humbje në radhët e saj gjatë luftimeve.
Megjithëse armëpushimi ka hyrë në fuqi, situata mbetet e tensionuar. Kryeministri izraelit Benjamin Netanyahu ka paralajmëruar pasoja të rënda për Hezbollahun, ndërsa zyrtarë iranianë kanë akuzuar Izraelin për nxitje të mëtejshme të konfliktit në rajon.
Burime amerikane bëjnë me dije se marrëveshja e armëpushimit është arritur pas negociatave ku kanë marrë pjesë SHBA-ja, Katari, Izraeli dhe Irani. Nga ana tjetër, autoritetet izraelite kanë deklaruar se do ta respektojnë marrëveshjen për aq kohë sa edhe Hezbollahu do t’i përmbahet asaj.
Pezullimi i bisedimeve bërthamore ka shtuar pasiguritë në tregjet ndërkombëtare. Trafiku detar në Ngushticën e Hormuzit është ngadalësuar, ndërsa investitorët po monitorojnë me vëmendje zhvillimet politike dhe të sigurisë në rajon. Në këtë kontekst, çmimi i naftës Brent është stabilizuar rreth nivelit të 80 dollarëve për fuçi.