Shtetet e Bashkuara dhe Kina kanë rënë dakord të zgjasin me dy muaj armëpushimin tregtar mes dy vendeve, duke shtyrë afatin e marrëveshjes së mëparshme deri më 10 janar.
Lajmi u bë i ditur nga Sekretari i Thesarit i SHBA-së, Scott Bessant, i cili tha se zgjatja do t’u japë Uashingtonit dhe Pekinit më shumë kohë për të vijuar negociatat dhe për të shqyrtuar mundësi të mëtejshme bashkëpunimi në fushën ekonomike.
Marrëveshja e mëparshme për uljen e tensioneve tregtare ishte parashikuar të skadonte më 10 nëntor. Megjithatë, të dyja palët kanë vendosur të mbajnë pezull përshkallëzimin e ri të masave ekonomike, ndërsa vijojnë bisedimet.
“Ne ramë dakord sot të zgjasim uljen e tensioneve ekonomike midis dy vendeve tona, e cila ishte caktuar të përfundonte më 10 nëntor, në mënyrë që të kemi më shumë kohë për të parë se çfarë mund të bëjmë në frontin ekonomik”, deklaroi Bessant në një intervistë për Fox News.
Zgjatja e armëpushimit tregtar u njoftua në një moment të rëndësishëm diplomatik, ndërsa Presidenti amerikan Donald Trump priti personalisht Presidentin kinez Xi Jinping në Shtabin e Përbashkët të Ushtrisë pranë Uashingtonit, në kuadër të vizitës shtetërore të liderit kinez.
Takimi mes Trump dhe Xi pritet të përfshijë diskutime mbi marrëdhëniet tregtare, tarifat, lëndët e para kritike dhe rivalitetin teknologjik mes dy ekonomive më të mëdha në botë.