Në nder të Kryepeshkopit të ndjerë Anastasi Janullatos, këtë të dielë në disa qytete janë mbajtur shërbesa dhe lutje.
Në Gjirokastër, Mitropoliti Dhimitër kreu një Lutje-Përkujtimore në Katedralen e qytetit, pas Liturgjisë Hyjnore, duke theksuar kontributin e rëndësishëm të Kryepeshkopit në ringritjen e kishave dhe manastireve.
Në Fier, besimtarët iu drejtuan Kishës së Shën Gjergjit për të nderuar figurën e Kryepeshkopit, duke falur dhe lutur për shpirtin e tij. At Dhimitri, i cili udhëhoqi shërbesën, vlerësoi punën e jashtëzakonshme të Kryepeshkopit në ringjalljen e besimit ortodoks në Shqipëri. Po ashtu, edhe në Elbasan, besimtarët e Kishës së Shën Kollit, një prej objekteve më të rëndësishme fetare, i dedikuan një meshë për shpirtin e tij.
Mitropoliti i Elbasanit, At Andoni e cilësoi Kryepeshkopin Anastas si një figurë të paharrueshme dhe theksoi rëndësinë e veprës së tij për Kishën Ortodokse dhe për ringjalljen e besimit pas periudhës komuniste.