Nga Esiona Konomi
Në gjithë këtë kohë tryesnuese, ata që sot kanë fëmijë në shtëpi, janë më të trembur se ata që kanë të moshuar.
Ata që i kanë fëmijët në shkollë, janë më të stresuar nga mësimi online se sa nga virusi.
Ministria e Arsimit duhet t’i japë fund kësaj veprimtarie të pakuptimë, për disa arsye:
1. Jo të gjitha familjet me fëmijë kanë telefonë inteligjentë. Jo të gjithë ata që kanë telefonë kanë mundësi të paguajnë internet cdo javë që të lidhen online me mësuesit. (Kjo vështirësi është dhe për mësuesit po ashtu).
2. Disa fëmijë po mësojnë online duke avancuar me programet, disa të tjerë jo. Kur të vijë dita e rinisjes së mësimit normal, fëmijët do jenë në nivele të ndryshme dhe do hasin vështirësi.
3. Prindërit janë mjaft të stresuar nga e gjithë kjo që po kanos botën. Në keni Zot, mos i ktheni sërish të mësojnë matricat apo lakimet. Është shumë!
E meqë mësuesit nuk i pyesni se sa e përballueshme është mësimdhënia online, gjeni një prind që s’po i del shpirti duke ndjekur mësimin online të një apo më shumë fëmijëve. SE PAKU, PYESNI PRINDËRIT.
PËR PAK KRAHASIM: Në Angli shkollat jo vetëm janë mbyllur, por këtë vit është anuluar cdo provim vjetor, semestral apo kualifikues. Fëmijët e punonjësve kyç shkojnë në shkollë, por nuk kryejnë mësim, kanë programe argëtuese për t’i shtensionuar fëmijët, teksa prindërit e tyre mjekë apo policë janë në krye të detyrës.