Studime të fundit tregojnë se ndërprerja e konsumit të alkoolit mund të përmirësojë pjesërisht dëmet që ai i shkakton trupit, sidomos nëse ndalet në kohë.
Sipas ekspertëve të cituar nga CNN, alkooli është një substancë toksike që lidhet me rrezik më të lartë për sëmundje të ndryshme, përfshirë kancerin, problemet e zemrës dhe sëmundjet kronike.
Sipas studimeve të reja, nuk ekziston një nivel plotësisht i sigurt i konsumit të alkoolit.
Të dhënat tregojnë se alkooli lidhet me dhjetëra sëmundje, si probleme të mëlçisë (cirrozë dhe mëlçi e dhjamosur), pankreatit, gastrit, ulçera, si dhe çrregullime të shëndetit mendor. Po ashtu, ai lidhet edhe me sëmundje të tjera serioze si kanceri i gjirit, goditjet në tru, diabeti dhe demenca.
Ekspertët shpjegojnë se edhe sasi të vogla alkooli mund të ndikojnë në sistemin imunitar dhe ta dobësojnë përkohësisht aftësinë e trupit për të luftuar infeksionet.
Konsumi i rregullt dhe i tepruar mund të sjellë dëmtime afatgjata në qelizat mbrojtëse të organizmit.
Në lidhje me trurin, studimet tregojnë se alkooli ndikon në kujtesë dhe vendimmarrje dhe mund të shkaktojë tkurrje të disa zonave të trurit. Disa nga këto dëmtime mund të përmirësohen pas ndalimit të konsumit, por jo gjithmonë rikthehen plotësisht.
Për zemrën, kërkimet tregojnë se konsumimi i lartë rrit rrezikun për tension të lartë dhe sëmundje kardiovaskulare, ndërsa edhe konsumimi i ulët nuk konsiderohet plotësisht i padëmshëm nga të gjitha organizatat shëndetësore.
Në përgjithësi, specialistët thonë se ndalimi i alkoolit mund të sjellë përmirësime të dukshme në shëndet, veçanërisht kur bëhet herët, por disa dëmtime nga përdorimi afatgjatë mund të mbeten të pakthyeshme.