Drejtori i Policisë së Shtetit, Ilir Proda mirëpriti homologun e Kosovës, kolonel Gazmend Hoxha dhe drejtues të strukturave të njësive speciale të Policisë së Kosovës. Vizita u zhvillua në kuadër të forcimit të bashkëpunimit, si dhe të shkëmbimit të eksperiencave dhe praktikave më të mira.
Gjatë takimit drejtuesit e policive simotra u dakordësuan për një bashkëpunim tërësor dhe pa barriera, i cili duhet të kulmojë gjatë sezonit veror 2025.
Me parandalimin dhe goditjen e trafiqeve të armëve, lëndëve narkotike dhe qenieve njerëzore. Delegacioni i Policisë së Kosovës vizitoi ambientet e Njësisë Speciale “RENEA” dhe Forcës Kombëtare të Sigurisë, Njësia Tiranë.
Këto vizita u realizuan për të parë nga afër organizimin, përvojën, si dhe metodologjitë e përdorura nga këto struktura të rëndësishme të Policisë së Shtetit, konkretisht: gjatë operacioneve të kërkim-shpëtimit, gjatë menaxhimit të situatave emergjente, si dhe gjatë operacioneve policore kundër terrorizmit dhe për rastet e pengmarrjeve.