Mbrëmjen e së hënës, Greqia bëri bashkë liderët e Ballkanit dhe zyrtarët më të lartë të Bashkimit Europian në Athinë. Në atë event mungoi përfaqësimi nga Shqipëria, për shkak të ftohjes së raporteve nga përplasjet për çështjen Beleri. Fokusi kryesor ishte “përshpejtimi i përpjekjeve të vendeve të rajonit për anëtarësim në BE”.
Mediat në Athinë raportojnë për 3 fitore të rëndësishme nga ky event. Fitorja e parë, sipas Kathimerinit, është që Greqia konfirmon rolin e saj si shtet lider në rajonin e Ballkanit.
“Qëllimi i dytë i arritur është mesazhi i rëndësishëm i mosftesës së kryeministrit shqiptar Edi Rama në darkë. Mesazhi nuk i drejtohej vetëm Tiranës, por shkoi në të gjitha drejtimet dhe konfirmon se Greqia nuk do të tolerojë asnjë lëvizje që cenon interesat e saj ose që nuk është në përputhje me standardet europiane. Qëndrimi i Athinës ka qenë prej kohësh i qartë se qeveria shqiptare ka tejkaluar kufirin me çështjen Beleri”, shkruan media Kathimerini.
Përplasjet Kosovë-Serbi morën vëmendje edhe në këtë takim, me Vuçiç që kërkoi sqarime për praninë e Kurtit në darkën e Mitsotakis, në një kohë kur Greqia nuk e njeh pavarësinë e Kosovës. Kurti kërkon nga Von Der Leyen që BE-ja t’i heqë masat ndaj Kosovës.