Gjykata britanike ka dënuar me 2 vjet e gjysmë burg Jamie Parsons, 31-vjeçarin që transportonte emigrantë shqiptarë të paligjshëm drejt Britanisë së madhe.
Ai u ndalua nga oficerët e Kufirit në zonën britanike të kontrollit në Coquelles, Francë, para se të hynte në tunelin e Kanalit.
I riu ishte duke drejtuar një mjet rulotë dhe tha para oficerëve se po kthehej nga një kamping në Belgjikë.
Atij iu kërkua kontroll i mjetit, ku në pjesën ku ndahej rulota me kabinën u gjetën dy shqiptarë. Dhe pas një kontrolli të plotë të mjetit, u gjetën dhe katër shqiptarë të tjerë të fshehur në pjesën e poshtme të krevatit, ku përdoret për magazinim.
Asnjë nga shqiptarët, katër burra dhe dy gra nuk kishte dokumente të rregullta për të hyrë në Britani. Shqiptarët iu dorëzuan autoriteteve francez që pas incidentit në gusht të 2017.