Gjykata e Posaçme ka vendosur masën arrest me burg, Ergys Ahmetjan, ndërsa burg me afat 30 ditor për dy të arrestuarit e tjerë, Andi Basha e Gëzim Kusi. Ata akuzohen për mashtrim në bashkëpunim të mbetur në tentativë, të kryer në kuadër të grupit të strukturuar kriminal. Në dosjen hetimore thuhet se arrestimi ka ardhur pas kallëzimit të shtetasit Erald Çaushi, që pretendon se ka një kushëri të vetin menaxher të një kazinoje në Tiranë pa treguar emër, që pretendon se njëri nga të pandehurit është prezantuar si Andi Basha, i cili i ka thënë se do shkonte ta takonte për porosinë e Tanit për 40 mijë euro.
Në bisedat që kanë patur me njëri-tjetrin, ai ka sqaruar se porosia ishte e Artan Lames. Çaushi ka nisur të dyshojë duke i kërkuar të shkojë në zyrë për të marrë paratë si dhe duke marrë shkas nga ngjarjet që kanë ndodhur më parë, të raportuara në media, ka vendosur të kajmërojë policinë me dyshimet se ka rënë pre e mashtrimit. Gjatë kohës që qëndronte me Bashën, Çaushi ka vërejtur bisedat që po fshinte i pandehuri në aplikacionin “SnapChat”. Përmbajtja e tyre ishte “fol i qetë, thuaj se më ka dërguar Artani për porosinë”. Gëzim Kusi që sipas prokurorisë ka gjetur Ergys Ahmetajt njl shok (Andi Bashën), pasi vetë nuk ka pranuar të shkonte të merrte paratë, pretendon se nuk është përfshirë në aktivitet. “Më tha Ergysi të shkoja të merrja një porosi te kazinoja, unë nuk pranova por i thashë ti gjeja një shok. Andi Basha pranoi dhe kanë kontaktuar dhe organizuar vetë planin”.