I ftuar “Në Kurthin e Piter Panit” këtë të hënë ka qenë aktori i njohur i humorit, Koço Devole, i cili shkaktoi mjaft të qeshura mes publikut por dhe fëmijëve.
I pyetur nëse emrin Koço e ka shkurtim, ai ka rrëfyer se kur i ati e ka regjistruar fillimisht në gjendjen civile, ka dashur ti vendosë emrin Konstandin. Por punonjësi i gjendjes civile i kishte thënë se është emër shumë i gjatë, dhe kështu ia kishte shënuar Kosta, e pastaj Koço.
Ndër pyetjet naive të fëmijëve nuk mungoi as ajo për natën e parë të martesës, ku mjeshtri i humorit nuk e ka kaluar pa të qeshura.
“Natën e parë të martesës e mora nusen në krahë dhe i thashë “O shpirt, kështu do të çoj tërë jetën në krevat, në krahë”. Kështu, vazhdoi viti i parë, i dyti, i treti, mirëpo, gruaja filloi të shëndoshej dhe nuk kisha fuqi më. Zgjodha një tjetër mënyrë: duke e mbajtur në kurriz, mirëpo edhe kjo metodë nuk vazhdoi gjatë. Mora madje edhe një karrocë vetëm që ta mbaja premtimin. Gruaja është shëndoshur shumë, por unë fjalën e mbaj. Do ta mbaj për gjithë jetën”,- tha ai.