45 vjet diktaturë, të përmbledhura në 60 minuta! Një sfidë që gazetari i njohur Blendi Fevziu ia doli me filmin “Diktatori”, ku rrëfen rrugëtimin e Enver Hoxhës përmes materialeve arkivore të papublikuara më parë.
Dëshmitë historike u shfaqën këtë të enjte përpara një audience të përzgjedhur nga bota e politikës, medias dhe diplomacisë së huaj. Një ide që sipas autorit lindi 10 vite më parë, e pas një pune të gjatë kërkimore, u kthye për të në një detyrim ndaj brezave të ardhshëm.
Blendi Fevziu: Ideja ime e parë ishte të bëja një dokumentar për jetën e diktatorit duke përdorur këto filmime, por në fund mendova për dhjetëra viktimat e EnverHoxhës, që ai i vrau, mijëra që ende nuk kanë një varr, dhe në fund vendosa të bëja një film për aktivitetin e Enver Hoxhës duke përfshirë edhe jetën e tij private.”
As përzgjedhja e 9 Dhjetorit, nuk ishte për të aspak një date e rastësishme.
Blendi Fevziu: 9 Dhjetori 1990 ka qenë dita më e rëndësishme e gjeneratës sime, dita ime e fundit e shkollës dhe dita e parë e lirisë, dita kur vrava frikën. Padyshim një nga lëvizjet më të rëndësishme në historinë e Shqipërisë”
Me tej autori ftoi në skenë kryeministrin Edi Rama, duke e sfiduar ashtu si në emisionin e tij me disa pyetje.
Blendi Fevziu: Si ndihesh që sot udhëheq partinë e Enver Hoxhës? A ka ndonjë moment që ke dashur të jesh Enver Hoxha, qoftë edhe për ndonjë moment?
Edi Rama: Kjo është një nga kontradiktat që mbart Ballkani dhe Shqipëria. Unë kam udhëhequr një nga lëvizjet më radikale kundër regjimit në Akademinë e Arteve, por kjo do një kohë të gjatë të shpjegohet, kështu që me mirë vetëm shijojeni.
Të flasësh për krimet e komunizmit është e nevojshme, por komunizmi vrau edhe disa fjalë si solidaritet, dashuria për vendin, dashuria për njëri – tjetrin, vetë dashurinë. Dhe pas rënies së komunizmit ne nuk mundëm t’i përvetësonim më. Kështu që nga një shoqëri kolektive u shndërruam në një shoqëri shumë individualiste. Kjo e shpjegon një pjesë të madhe të tranzicionit!
Krahas filmit “Diktatori”, biografia e Enver Hoxhës është tashmë e përkthyer në 11 gjuhë të huaja duke ngjallur kureshtjen e mijëra lexuesve anembanë botës, që duan ta njohin Shqipërinë në çdo dritëhije historike.