Një ngjarje e rëndë u raportua ditën e sotme në plazhin e Vilë Boshtovës, në Kavajë. Babai Elvis Halilaj dhe dy djemtë e tij të mitur rreth 13 dhe 15 vjeç, u mbytën në det.
Sipas informacioneve, deti ka qenë i trazuar dhe me dallgë të mëdha. Fillimisht dy djemtë kanë hyrë për tu larë, por janë rrezikuar për shkak të dallgëve.
50-vjeçari ka hyrë t’i shpëtojë, pasi dyshohej se një nga fëmijët po mbytej. Por situata ka qenë e vështirë dhe për shkak të dallgëve e kanë patur të pamundur të dilnin në breg.
Pas ngjarjes tragjike në plazhin Vilë-Boshtovë, në Kavajë janë vendosur flamujt e kuq në bregdet.
Flamujt janë vendosur për të sinjalizuar pushuesit që deti është i trazuar dhe rrymat janë të forta.
Disa orë më parë në bregdetin shqiptar humbën jetën babai, Elvis Halilaj (50 vjeç) dhe dy djemtë e tij të mitur (13 dhe 15 vjeç) si pasojë e rrymave detare. Sakaq mësohet se ambulanca ka mbërritur rreth një orë e gjysmë me vonesë dhe se në vendngjarje nuk ka pasur roje bregdetare që të sinjalizonin pushuesit.