Borussia Dortmund arriti një fitore të madhe në “San Siro” përballë Milanit. Verdhezinjtë presin PSG-në në “Signal Iduna Park” në takimin e fundit në grupin F, aty ku mjafton një pikë për të siguruar kalimin në raundin e 1/8-ve si forcë e parë. Milani duhet të fitojë në Angli kundër Newcastle dhe të shpresojë te suksesi i Dortmundit me kampionët e Francës për të vijuar rrugëtimin në Champions League.
Trajneri i verdhezinjve, Edin Terzic nuk e fsheh lumturinë për fitoren në Milano, ndërkohë që premton se djemtë e tij do të tentojnë tri pikët edhe përballë skuadrës së Luis Enriques.
“Nuk duam të bëjmë asnjë dallim mes ndeshjeve të ndryshme: do të luajmë për të fituar. Nuk duam t’u dhurojmë asgjë PSG-së, Newcastle dhe Milanit. Do të vijnë 80 mijë njerëz në stadium dhe ne mund të sigurojmë vendin e parë. Kështu që do të japim gjithçka. Unë jam gjithmonë shumë i motivuar”.