Sot me nisjen e vitit të ri akademik, nuk u ndal as bojkoti i mësimit nga pedagogët, ashtu siç ishte paralajmëruar. Kreu i sindikatës se pedagogëve, Sandër Kovaçi, thotë se bojkoti do të vijojë çdo ditë derisa kërkesat të plotësohen. “Sot nuk ka mësim fare. Edhe ne nuk do të kemi asnjë ndryshim, do të vazhdojmë me protestën për arritjen e qëllimit tonë. Do të vazhdojë bojkoti”, tha Kovaçi.
I pyetur rreth vijimit të mësimit në disa universitete në qytete të tjera të vendit, ai tha: “Rrethet janë një pjesë që vazhdojnë bojkot, disa janë në mësim, sepse janë të lirë. Ata që kanë mundësi të firmosin në disa bordero, përveç se të universitetit, mund të shkojnë në mësim. Por ideja është që, ata që mendojnë seriozisht për universitetin dhe e mendojnë si punë kryesore, janë të mirëpritur që të vazhdojnë”.
Sindikata ka refuzuar propozimin e qeverisë për rritjen me 15% të pagave, 7% të përballuar nga qeveria dhe 8% nga buxheti i vetë universiteteve. Pedagogët kërkojnë rritje të rrogës me 50% brenda dy viteve.