Prej vitesh banorët e qytetit të minatorëve Bulqizë ankohen se aksidentet e ndodhura në “galeritë e ferrit” nuk raportohen në kohë reale pranë strukturave shtetërore, Policisë, Prokurorisë, Inspektoratit të Punës, RISHM-it, etj.
Kjo akuzë është faktuar ditët e fundit nga Inspektoriati i Punës Dibër. Drejtues të saj shprehen se nga ana e Spitalit Bashkiak Bulqizë nuk njoftohen zyrtarisht për aksidentet e ndodhura në minierat e Bulqizës.
Në një shkresë zyrtare të këtij institucioni thuhet se: “Mbetet problematikë e përsëritur mos raportimi i rasteve të aksidenteve në punë nga ana e Spitalit Bulqizë”.
Mësohet se në raste të caktuara, për të ndihmuar subjektet private minerare, të plagosurit rëndë janë mjekuar në fshehtësi dhe janë dërguar drejt spitaleve të tjera ose në shtëpinë e minatorit, duke e mbajtur të fshehtë ngjarjen.
Ngjarja më e rëndë ndodhi ditë më parë kur një minator ndërroi jetë në spital dhe i vdekuri u dërgua në shtëpi, duke tentuar ta konsiderojnë atë si vdekje natyrale. Ishin mediat ato që e zbuluan dhe raportuan ngjarjes siç ajo kishte ndodhur.
Dyshohet se drejtuesit e firmave minerare paguajnë zyrtarë dhe punonjës të spitalit lokal që ato t’i mbajnë sekret ngjarjet e ndodhura në galeri.
Është detyrë e organeve të specializuara të hetojnë rreth akuzave zyrtare të Inspektoratit të Punës Dibër dhe të zbardhin të vërtetën, në mënyrë që këtej e tutje të mos luhet me jetën e qytetarëve.