Kryebashkiakja demokrate e Shkodrës Voltana Ademi duket se e ka ndjerë frikën e zgjedhjeve të 30 Qershorit.
Ademi ka nxjerrë një urdhër të brendshëm, ku detyron të gjithë punonjësit e administratës së bashkisë së Shkodrës, të punojnë të shtunën dhe të dielën e votimeve nga ora 7 e mëngjesit deri në 19:00 të pasdites.
Ndërkaq, kryeministri Edi Rama ka vijuar reagimet në rrjetet sociale për kreun e PD, Lulzim Basha.
Referuar urdhrit të Voltana Ademit që administrata e Bashkisë Shkodër duhet të paraqitet në punë gjatë fundjavës, kreu i qeverisë shtron disa pyetje.
“Dhe meqë jemi tek dora jote e fshehur dhe gurët e tu të hedhur, po këtë shkresën e kësaj Qamile Haxhiut të Shkodrës e ke urdhëruar ti apo e ka bërë në kokë të vet kjo molotokratja?
Dil sqaroje Artist ç’është ky pasion për punë në ditë pushimi në një bashki që ka 4 vjet në gjumë!” – shkruan Rama.
Më herët kryeministri reagoi edhe për kryebashkiakun e shkarkuar, Zef Hila dhe djegien e KZAZ në Vaun e Dejës.
