Rubén Robles dhe Jéssica Sales prej muajsh ishin përgatitur për të vizituar Shqipërinë, pasi janë të apasionuar pas kanioneve, si edhe kishin dëshirë për të zbuluar më shumë për vendin tonë. Ata shoqërohen nga spanjollë të tjerë të ardhur për të njëjtin qëllim, por deri më tani asnjëri prej tyre nuk kanë mundur që të zbulojë më shumë për Shqipërinë dhe shkak për këtë është bërë një problem i ndodhur me linjën e fluturimeve Wiz Air. Kjo linjë e cila shpesh shtyn oraret e fluturimeve ose i anulon ato, pa lajmëruar pasagjerët, kësaj here nuk u ka sjellë turistëve valixhet në Tiranë.
Turistët spanjollë kanë udhëtuar nga Barcelona për të vizituar Shqipërinë, valixhet e tyre kanë mbetur në aeroportin El Prat. “Një koleg ka një GPS në valixhen e tij dhe i thotë se janë ende në Barcelonë”, thotë Rubén.
Përveç problemit me valixhet, turisti spanjoll nxjerr një pah edhe një problematikë, shtyrjen e orarit të udhëtimit. Ai thotë se udhëtimi ishte planifikuar në orën 10:00, por avioni u nis në 13:00.
“Na kanë ngatërruar udhëtimin. Fluturimi duhej të nisej në dhjetë, hipëm në aeroplan në njëmbëdhjetë dhe ai nuk u ngrit deri gati në një. Ata që erdhën të shtunën kishin katër orë në aeroport. Dhe për më tepër, kur mbërritëm, të gjithë u gjendëm pa bagazhe”.