Vitin që po vjen për herë të parë do të nis zbatimi i planit për skanimin e integritetit të zyrtarëve publike për disa degë të administratës publike.
Ky proces konsiston në skanimin e ndershmërisë së individëve të punësuar në sektorin publik, si parakusht për të parandaluar korrupsionin.
Nisma në fakt është parashikuar në planin e veprimit 2018–2020, në zbatim të Strategjisë Ndërsektoriale kundër Korrupsionit. Institucioni i parë që do të nisë zbatimin e tij është vetë Ministria e Drejtësisë.
Plani, i cili është hartuar tashmë dhe që pritet të vihet në zbatim në gjysmën e parë vitit 2020, do të shërbejë si model për t’u ndjekur nga ministritë e tjera, për t’u shtrirë më pas në çdo degë të administratës publike. Krahas Ministrisë së Drejtësisë, javët e fundit të vitit 2019, edhe baskitë kryesore në vend kanë nisur lëvizjet dhe takimet për hartimin e planeve të integritetit për zyrtarët e tyre. Nisma financohet buxheti i shtetit, qeveritë e Shteteve të Bashkuara të Amerikës, Suedisë, Italisë, Zvicrës, Programi i OKB-së për Zhvillim etj.
Sipas shqiptarja.com, plani i integritetit parashikon një sërë masash për të parandaluar shkeljet që cenojnë integritetin e zyrtarëve publikë. Më konkretisht, çdo institucion shtetëror do të miratojë dhe publikojë në faqen zyrtare planin e integritetit, ashtu siç kanë miratuar programin e transparencës. Në plan do të përfshihen informacione mbi reagimet institucionale ndaj sjelljeve morale dhe profesionale të papranueshme të punonjësve publike, informacion mbi pranimin e dhuratave, rastet e korrupsionit, kodi i mirësjelljes, veprimet disiplinore të regjistruara, trajnimet mbi etikën etj. Ecuria e zbatimit të kësaj nisme do të monitorohet nga Task-Forca Ndërinstitucionale Antikorrupsion, e cila përbëhet nga përfaqësues të kabinetit të kryeministrit, drejtori i Përgjithshëm i Agjencisë së Prokurimit Publik, Inspektori i Përgjithshëm i Inspektoratit
Qendror si dhe nga drejtori i Departamentit të Burimeve, Transparencës dhe Administrimit në Kryeministri.