Socialistët e Shkodrës i kërkojnë kryebashkiakes Voltana Ademi që të shpallë listën e zgjedhësve që pritet të votojnë në zgjedhjet e pjesshme lokale të 6 marsit.
Zëdhënësi i PS në Shkodër, Erion Metushi,deklaron se kryebashkiakja Ademi është në shkelje të afateve të vendosura nga KQZ.
“Në njoftimin zyrtar shkruhet se Zyrat e Gjendjes Civile duhet të hartojnë listat e zgjedhësve jo më vonë se data 25 Janar 2022. Ndërkohë që brenda 48-orëve nga përfundimi i përditësimit, kryetarët e Njësive vendore i miratojnë dhe i shpallin sipas nenit 48 të Kodit Zgjedhor.
Bashkia Shkodër që në nisje të këtij procesi është jashtë afateve ligjore. Listat duhet të ishin miratuar dhe shpallur më datën 27 janar, por dhe pas 24-orëve ky detyrim nuk është përmbushur. Partia Socialiste Shkodër i bën thirrje zonjës Voltana Ademi që të respektojë detyrën që Kodi Zgjedhor i ngarkon”, tha zëdhënësi i PS-së.