E shtuna është ditë zie në Kosovë, pë të nderuar policin e vrarë në detyrë Izet Demaj. Ky është vendimi i presidentit të Republikës, Hashim Thaçi, i cili nderon rënien heroike të 42 vjeçarit. Në Istog përveç policit Izet Demaj, i vdekur mbeti edhe grabitësi i bankës, Kamer Metaj, i cili i shkaktoi vdekjen Demajt.
“Presidenti i Republikës së Kosovës, Hashim Thaçi, pas rënies heroike në mbrojtje të qytetarëve dhe në krye të detyrës të pjesëtarit të Policisë së Kosovës, Izet Demaj, ditën e shtunë më 29 dhjetor 2018, në shenjë nderimi shtetëror e ka shpallur ditë zie në Republikën e Kosovës. Në ditën e zisë shtetërore, në shenjë respekti për aktin heroik të policit Izet Demaj, në pajtim me legjislacionin në fuqi, flamuri shtetëror ngrihet në gjysmështizë në të gjitha objektet shtetërore të Republikës së Kosovës, brenda dhe jashtë vendit”, thuhet në njoftimin e presidentit.
Agjenda e ceremonisë komemorative për policin Izet Demaj, e cila mbahet nën patronatin e Policisë së Kosovës, sot, më 29.12.2018, Istog-Koshare.
Agjenda:
Ora 11:00 – nisja e kortezhit nga fshati Vrellë e Istogut për në varrezat e dëshmorëve në Koshare,
Ora 13:30 – arritja e arkivolit në Koshare,
Ora 13:30 -14:00 – homazhe,
Ora 14:00 -14:30 – fjalimet,
Ora 14:30 – ceremonia e varrimit