Pasi kontrata origjinale 10-vjeçare e firmosur mes shtetit dhe biznesmenit Ilir Rrapaj të arrestuar për mashtrim u raportua se ka humbur, sot Prokuroria e Posaçme ka deklaruar se ka kontratën origjinale të koncesionit të sterilizimit.
SPAK thotë se e disponon kontratën origjinale, por nuk u gjet në Ministrinë e Shëndetësisë. Sipas SPAK, origjinali u gjet në institucione të tjera. Në reagimin e dy ditëve me parë, SPAK deklaroi se e kishte kërkuar gjithandej por nuk e kishte gjetur as në arkivën e ministrisë.
Ish-zv/ministri i Shëndetësisë, Klodian Rrjepaj, dhe biznesmeni i sterilizimeve Ilir Rrapaj u arrestuan të enjten nën akuzat e shpërdorimit të detyrës dhe falsifikim dokumentash në bashkëpunim lidhur me koncensionin e sterilizimit afro 100 milionë dollarë të 8 viteve më parë, i cili nga dhjetori 2015 dhe deri sot ngjalli dyshime për korrupsion, shkelje të barazisë në garë dhe mosplotësim të kritereve ligjore.