Këtë të enjte Gjykata e Posaçme shtyu për më 19 korrik, seancën për informacion dy mujor të Sali Berishës dhe dhëndrit të tij, Jamarbër Malltezi. Shkak u bë kërkesa e mbrojtjes për të marrë kopje të akteve të dosjes, për te cilat ju kërkohet pagesë. Prokuroria ka kërkuar zgjatje të hetimeve me 3 muaj deri më 2 tetor.
“Gjykata vendosi që aktet duhen marrë me pagesë, nuk e di sa është pagesa. Ne nuk folëm në nivel financiar, u diskutua problemi që ne na takojnë këto akte dhe në fund gjykata si për ekspertët, si për fotokopjet e akteve, në bazë të vendimit të fajësisë apo pafajësisë, zgjidhet dhe problemi i shpenzimit gjyqësor.
Mirëpo këta po hapin shkolla të reja për të krijuar pengesa artificiale për procesin sepse nuk e kanë fare problem të bëjnë fotokopjen dhe në fund zgjidhen problemet e shpenzimeve gjyqësore, se nuk është problem kaq madhor. Duhet të jenë 12 fashikuj. Proceset politike kanë rendimentin më të lartë se printohen letra pa lidhje”,-tha avokati i Berishës.