Kryetarja e Kuvendit, Elisa Spiropali priti sot në Kryesinë e Kuvendit, Presidentin e Sllovakisë, Peter Pellegrini, i pari President Sllovak që po zhvillon një vizitë zyrtare në Shqipëri.
Spiropali vlerësoi marrëdhëniet e shkëlqyera mes dy vendeve si dhe mes Kuvendit të Shqipërisë dhe Parlamentit Sllovak dhe vuri në dukje se ka ende mundësi të pashfrytëzuara për zgjerimin e bashkëpunimit dypalësh ekonomik e tregtar dhe shtimin e investimeve sllovake në Shqipëri.
Dy vendet tona kanë një bashkëpunim shumë të mirë në organizatat ndërkombëtare, NATO, OKB, OSBE etj., i cili do të vijojë në mbrojtje të sigurisë dhe të paqes, theksoi Spiropali. Po ashtu Spiropali vlerësoi mbështetjen e fuqishme të Sllovakisë për integrimin europian të vendit tonë dhe të vendeve të Ballkanit Perëndimor.
Ajo vuri në dukje objektivin kombëtar strategjik të Shqipërisë për anëtarësimin në BE brenda vitit 2030 si edhe mbylljen e negociatave teknike brenda vitit 2027. Nga ana tjetër, shprehu bindjen se Sllovakia do të vijojë të jetë një një partner i rëndësishëm i anëtarësimit të Shqipërisë në Bashkimin Europian.