Sot bëhen 12 vite nga tragjedia e 21 Janarit 2011 ku në Bulevardin “Dëshmorët e Kombit” humbën jetën 4 protestues. Në një deklaratë për shtyp, ministrja e Shtetit për Marrëdhëniet me Parlamentin, Elisa Spiropali, tha se atë ditë nuk pati vdekje aksidentale, por vrasje shtetërore.
Ajo u shpreh se mazhoranca nuk ka hequr dorë së kërkuari drejtësi për këtë ngjarje. Sipas saj, duhet reagim i menjëhershëm i organeve të drejtësisë pas publikimit të transkriptit të një audioje ku flitet për gatishmëri për zjarr sapo protestuesit të kalonin gardhin e Kryeministrisë, ndërkohë që 4 viktimat u vranë shumë larg kryeministrisë.
“E dinë të gjithë që më 21 Janar nuk pati vdekje aksidentale, por vrasje shtetërore. Por publikimi dje i transkriptit të një audioje ku flitet për armë zjarri dhe gatishmëri për zjarr sapo protestuesit kalojnë gardhin ndërkohë që 4 dëshmorët e asaj dite të zymtë u vranë shumë larg gardhit të Kryeministrisë kërkon reagimin e menjëhershëm të organeve të drejtësisë. Ky është një fakt i ri që bërtet shumë fort për drejtësi në emër të viktimave, jetimëve, familjarëve dhe vetë demokracisë së përgjakur më 21 Janar. Nuk jam këtu për të bërë politikë sot në ditën e homazheve që sot do të bëhen me një dritëz të re shprese se drejtësia e re do të hapë menjëherë hetimin e çështjes. Jam këtu për të thënë se ne nuk kemi hequr dhe nuk do të heqim dorë kurrë nga drejtësia për 21 Janarin, por drejtësinë e kërkojmë nga drejtësia. Sot edhe më shumë sepse ato zëra nga shpella e vrasjeve të asaj dite tragjike flasin vetë edhe më shumë se sa të gjithë fjalët tona”, u shpreh Spiropali.
Nga protesta e 21 Janarit në vitin 2011 humbën jetën Aleks Nika, Ziver Veizi, Faik Myrtaj dhe Hekuran Dedja. Në vitin 2021 ata u shpallën “Dëshmorë të Atdheut” nga kryeministri Edi Rama./tvklan.al