Për herë të parë, kryeministri Edi Rama ka folur më gjatë për ngjarjen në Gramsh, për arrestimin e rusëve që u kapën në uzinë dhe që sulmuan ushtarakët. Rama e zhvlerëson si ngjarje, kur thotë se “është për të qarë e për të qeshur, nuk janë as fabrika që prodhojnë armë”.
Ai tha se është për të qeshur gjithë rëndësia që iu dha kësaj çështjeje dhe mënyra si u trajtua, pasi ajo uzinë nuk është një objekt i rëndësisë së veçantë, është thjeshtë një karakatinë e komunizmit, e cila është në atë gjendje sa i priten edhe dritat. Rama theksoi se me rëndësi është qëllimi i tyre në Shqipëri dhe për këtë gjë po punojnë hetimet të cilat pritet të nxjerrin në dritë rezultate.
“Mjergulla e ngritur mbi objektet e rëndësisë së veçantë ishte për të qarë dhe për të qeshur. Ato nuk janë objekte të rëndësisë së veçantë. Ata janë karakatina të skualifikuara nga objektet e rëndësisë së veçantë që në vitin 2012. Ato janë deri në pikën ku iu priten edhe dritat por kanë disa roje që janë për të mbrojtur atë perimetër nga zaptimet. Të thuash se po bëjnë spiunazh duke fotografuar mbetjet e komunizmit është qesharake.
Ajo që duhet të na shqetësojë është që çfarë qëllimesh kanë këta persona në vendin tonë. I takon hetimit të nxjerrë më shumë, shqetësimi ynë është se çfarë qëllimesh kanë këta persona. Duhet të shohim nga hetimi dhe gjykimi se cili është qëllimi i vërtetë.
Të flasësh për cënim të sigurisë kombëtare se u shfaqën disa persona të dyshimtë është e drejtë po se u shfaqën duke fotografuar ca mbeturina të komunizmit është qesharake. Por se çfarë fshihet pas kësaj, që u bë e madhe me ndihmën tuaj, do të zbulohet nga hetimet”.