Rreth 20 persona janë arrestuar në Maqedoninë e Veriut, të dyshuar si lidhje me ISIS. Operacioni i gjerë është zhvilluar gjatë orëve të natës në disa qytete ku janë konfiskuar edhe armatime.
Në një komunikate të orëve të vona të ministrisë së Brendshme maqedonase thuhet se është parandaluar një sulm terrorist i grupeve radikale përkrahëse të ISIS, dhe këto informacione janë shkëmbyer me shërbimet e një vendi partner, po pa dhënë detaje të tjera apo identitet të të arrestuarve, raporton Alsat M.
Ndaj këtij operacioni ka reaguar edhe ambasada amerikane në Shkup, ku thuhet se ekziston rrezik i lartë i sulmeve terroriste të frymëzuar nga ideologjitë ekstremiste në Maqedoninë e Veriut.
“ISIS ka për qëllim që t’i sulmojë qytetarët, duke përfshirë edhe qytetarët amerikan që udhëtojnë jashtë shtetit. Terroristët po përdorin gjithnjë e më shumë metoda më pak të sofistikuara. Ekziston rrezik i lartë i sulmeve terroriste të frymëzuar nga ideologjitë ekstremiste në Maqedoninë e Veriut. Sulmet terroriste dhe incidentet tjera të sigurisë shpesh ndodhin pa asnjë paralajmërim, ndërsa qytetarët e SHBA-së inkurajohen që të jenë të vëmendshëm. Ekstremistët më shumë tentojnë të identifikojnë dhe të sulmojnë “objektivat e mëdha” siç janë qendrat tregtare dhe tregjet, aeroportet, hotelet, klubet dhe restorantet, vendet e adhurimit, shkollat, mitingjet partiake, demonstratat, festat”- shkruhet më tej në faqen zyrtare të Ambasadës amerikane në Shkup.