Superliga shqiptare e futbollit mbylli fazën e parë, me Egnatian që mban vendin e parë me 19 pikë, dy më shumë se Partizani ndjekës që ka edhe një ndeshje më pak (kundër Teutës).
Në javën e nëntë, që ishte e fundit për fazën e parë, trajneri Luigi Di Biagio i Dinamos dha dorëheqjen. Largimi i italianit ishte i radhës këtë sezon, teksa gjashtë skuadra në më pak se dy muaj kanë ndërruar të paktën një herë trajnerin.
Që në javën e parë ishte Stavri Nica që la Laçin i shkarkuar dhe pas një jave zuri vendin e Rraman Hallaçit, po të shkarkuar nga Kukësi. Më pas ishte radha e Teutës për të larguar Diego Longon, me Edi Martinin që për herë të katërt u rikthye në stolin e durrsakëve. Sërish Laçi largoi Skerdi Bejzaden për Mirel Josën.
Përpara derbit, Tirana dhe Partizani ndryshuan trajnerët, me Orges Shehin që u shkarkua nga bardheblutë dhe Zoran Zekic që u shit nga “Demat” te Osijek në Kroaci.
Fundjavën që lamë pas ishte radha e Dinamos, me Luigi Di Biagion që u mposht 2-3 me përmbysje nga Teuta. Kësisoj, janë vetëm katër klube në Superligë që nuk kanë ndryshuar trajner.
Egnatia, Vllaznia, Skënderbeu dhe Erzeni janë klubet solide që i kanë qëndruar stoik zgjedhjes së parë. Më shumë se për rezultatet, lëvizjet e gjashtë trajnerëve në më pak se dy muaj kampionat tregojnë ide jo të qarta dhe plane jo konkrete në fillim të sezonit.