Deputetja e PD-së, Jorida Tabaku ka denoncuar gjendjen e rënduar të industrisë prodhuese dhe bujqësisë në Shqipëri. Kjo duke i cilësuar si sektorë në prag të falimentimit për shkak të politikave të dështuara ekonomike të qeverisë.
Tabaku theksoi se bujqësia ka pësuar rënie për gjashtë tremujorë radhazi, ndërsa industria prodhuese po përballet me vështirësi ekstreme për shkak të zhvlerësimit të euros dhe ngarkesës fiskale. ”100 mijë punonjës të industrisë fason janë në rrezik, ndërmarrjet po mbyllin dyert, eksportet janë në rënie të lirë”,-tha Tabaku. Sipas deputetes demokrate, qeveria socialiste ka pasur 12 vite në dispozicion për të ndryshuar situatën ekonomike. Për të ekonomia shqiptare ka nevojë për një model të ri.
”Ekonomia shqiptare ka nevojë për një hov të ri, për një politikë të re, për një stimul që nuk erdhi kurrë në 12 vite”,-tha Tabaku, duke prezantuar alternativën e Partisë Demokratike për një model ekonomik që mbështet prodhimin vendas, eksportet dhe një regjim fiskal të favorshëm për bizneset. Në përfundim, Tabaku theksoi se ndërsa qeveria vijon të miratojë marrëveshje formale pa ndikim në sektor, bizneset e ndershme po falimentojnë.