Deputetja e PD-së, Jorida Tabaku, ka denoncuar situatën alarmante ekonomike në Shqipëri. Për të çdo shqiptar paguhet mesatarisht veç 2.47 euro për orë. Tabaku pohon se është e padrejtë dhe kjo situatë duhet të ndryshojë urgjentisht.
Postimi i plotë
Çdo shqiptar sot paguhet vetëm 2.47 euro për orë. Kjo vlen vetëm për ata që kanë fatin të jenë në punë, sepse pjesa më e madhe janë pa punë. Kjo normë pagese është më e ulëta absolute në të gjithë rajonin. Pse puna e një shqiptari duhet të vlejë më pak?
Pse një shqiptar paguhet sa gjysma e atij që punon në Mal të Zi? Ai që punon nga mëngjesi deri në darkë, duhet të ketë fuqinë më të ulët blerëse në rajon? Dhe të përballojë me vështirësi rritjen e vazhdueshme të çmimeve?
Sot tregjet në Shqipëri janë të kapura, dhe shumica e buxheteve familjare shkon vetëm për ushqim. Si mund të ndryshojë kjo situatë?
Aplikimi i taksës së sheshtë prej 10% për punën. Kjo i jep dinjitet dhe vlerë punës, duke e bërë atë konkurruese me vendet e tjera të rajonit.
Çlirimi i tregjeve dhe heqja e të gjitha taksave që do të sillnin ulje çmimesh. Rritja e konkurrencës dhe eliminimi i monopoleve e oligopoleve në tregjet shqiptare do të çonte në ulje të çmimeve për qytetarët.
Ekonomia është shumë e thjeshtë; ajo që ka munguar është vullneti politik. PD propozon një program ekonomik që u shërben të gjithë shqiptarëve, duke krijuar një ekonomi të shumicës.