Përplasja mes Partisë Demokratike dhe Shtëpisë së Lirisë duket se ka sjellë edhe reagimet e para mes përfaqësuesve të tyre politikë.
Deputetja e PD-së, Jorida Tabaku bëri një dalje për mediat sot nga Vora, për të akuzuar komisionerët e LSI-së se bllokojnë procesin si dhe bëri thirrje për të votuar kandidatin e PD-së, duke thyer kështu heshtjen zgjedhore.
“I kërkoj gjithë qytetarëve të Vorës, të Marqinetit, Marikaj, Muçaj, Pezë, Fushë-Prezë dhe të gjithë zonave përreth në bashkinë Vorë, që të vijnë dhe votojnë për subjektin Partia Demokratike. Në fletën e votimit ka vetëm një subjekt që e përfaqëson opozitën shqiptare që është Partia Demokratike”, tha Tabaku duke bërë dallimin mes PD-së dhe Shtëpisë së Lirisë.
Më herët, kreu i KQZ, Celibash i i bëri thirrje palëve të përfshira në zgjedhje se deri në mbylljen e procesit të votimit duhet respektuar heshtja zgjedhore.
“I rikujtoj të gjitha palëve të përfshira në #Zgjedhje6Mars se deri në mbylljen e procesit të votimit jemi në kushtet e heshtjes zgjedhore. Çdo thirrje tjetër politike drejt zgjedhësve përveç atyre për pjesëmarrje në votime, është në kundërshtim me dispozitat e Kodit Zgjedhor. Mirëpresim çdo angazhim nga subjektet zgjedhore në mirëadministrimin e procesit.”-tha Celibashi.
Por Tabaku nuk e respektoi heshtjen zgjedhore, thyerja e së cilës ndëshkohet me gjobë me 500.000 lekë të reja nga Komisioni Qendror i Zgjedhjeve.
“Neni 174 Thyerja e heshtjes zgjedhore:
- Subjekti zgjedhor që thyen heshtjen zgjedhore, sipas nenit 77 të këtij Kodi, gjobitet nga KZQ-ja me 500,000 lekë.
- Ankimi ndaj vendimit të KQZ-së për gjobën nuk pezullon ekzekutimin e saj.”
