Delegacioni i Parlamentit Europian ka përfunduar takimin këtë paradite me kryetarin e Kuvendit Gramoz Ruçi. Ky i fundit tha për emdiat se objektivat për integrimin e vendit janë drejt përmbushjes, duke theksuar suksesin e reformës në drejtësi që sipas Ruçit, mbështetet nga 99% e shqiptarëve.
Zgjedhjet e 2017 janë të certifikuara nga opozita, tha kreu i Kuvendit, teksa u shpreh se “Parlamenti është legjitim, sepse vjen nga zgjedhje të ndershme”.
Për reformën zgjedhore Ruçi tha se paketa është depozituar në Kuvend. Një ditë më parë delegacioni i PE-së zhvilloi takim me ministrin e Brendshëm Sandër Lleshaj, kreun e PD-së Lulzim Basha dhe të LSI-së, Monika Kryemadhi.
Ndërkaq, po sot, delegacioni do të mbajë një konferencë për shtyp në Tiranë. Delegacioni kryesohet nga Tunne Kelam, ndërsa në përbërje të tij do të jenë; Cristian Preda, Knut Fleckenstein, Juan Fernando Lopez Aguilar, Bas Belder, Ilhan Kyuchyuk dhe Tamás Meszerics.