Talebanët i kërkuan Uashingtonit të shtunën që të lirojnë rezervat e bllokuara të bankës qendrore të Afganistanit, gjatë një takimi me një delegacion amerikan në Katar, dialogu i parë ballë për ballë në një nivel të lartë që kur grupi islamik mori kontrollin e vendit pas tërheqjes së Shteteve të Bashkuara në fund të gushtit.
Ministri në detyrë i talebanëve, Amir Khan Muttaqi, i cili kryeson delegacionin afgan në bisedimet dy-ditore në kryeqytetin e Katarit, Doha, tha se delegacioni amerikan në seancën hapëse premtoi se do të mbështesë ndihmën humanitare për vendin e tij të goditur nga trazirat dhe se Shtetet e Bashkuara do të ofronin vaksina kundër koronavirusit për popullin afgan.
Në një mesazh audio, që talebanët ndanë me gazetarët, ministri Muttaqi tha se ata diskutuan “hapjen e një kapitulli të ri” midis të dy palëve, dikur kundërshtarë gjatë ndërhyrjes gati 20-vjeçare të Shteteve të Bashkuara në Afganistan.
Në takim është duke u theksuar “nevoja për të krijuar marrëdhënie të mira pozitive me njëri -tjetrin në baza të barabarta. Ne theksuam nevojën për shkrirjen e pasurive financiare afgane pas rrethanave të vështira me të cilat përballet Afganistani, “tha ministri i jashtëm.
Uashingtoni ka bllokuar miliarda dollarë të pasurisë afgane, kryesisht të depozituara në rezervën federale amerikane, që kur talebanët morën kontrollin e vendit. Banka Botërore dhe Fondi Monetar Ndërkombëtar gjithashtu kanë bllokuar ndihmën për zhvillimin, duke përmendur shqetësimet për të drejtat e njeriut nën sundimin taleban.
Sipas Bankës Botërore, largimi i forcave të udhëhequra nga SHBA dhe shumë donatorëve ndërkombëtarë bënë që Afganistani të mos ketë më qasje tek fondet që financonin 75% të shpenzimeve publike, Kjo e ka bërë të vështirë për talebanët që të paguajnë rroga për punonjësit e qeverisë.//VOA