Shtimi i rasteve të reja me COVID gjatë ditëve të fundit në vend është kthyer në një shqetësim serioz.
Mjeku pneumolog, Ardian Jorgji, i ftuar këtë të shtunë në emisionin “Kjo Javë”, kërkoi që të tregohet kujdes, pasi në këtë periudhë virulenca është shumë e lartë.
Nëse shfaqni për disa ditë temperaturë, shtim të kollës apo probleme me frymëmarrjen, ai bëri thirrje që të shkoni dhe të bëni menjëherë ekzaminim klinik.
Ndër të tjera, Jorgji tha se moshat e reja rezultojnë më së shumti të infektuar, ndaj këshillon për rritje të vigjilencës.
“Virulenca është e lartë, nëse flasim për situatën aktuale dhe mutacionet në terren, virulenca është shumë e lartë ndaj janë dhe këto shifra. Do bëja një diferencim, direktiva në botë sot është “edhe rrufë të kesh, duhet të provosh që nuk ke Covid”. Sot mund të kesh kollë, teshtima, i ftohur, nga ndryshime të temperaturave, deri dhe nga refluksi, kështu që gama e këtyre simptomave është e gjerë dhe jo e thjeshtë për tu vlerësuar dhe nga një mjek klinicist, kështu që do një kujdes të madh. Karakteristikë sa i përket mutacioneve të Covid në këtë periudhë, janë temperaturat e larta, mbi 38 që mund të shkojnë deri në 40 gradë dhe zgjasin deri në 6 ditë, dhimbje koke, kocke, diarre, kollë të thatë… nëse në vijim shtohet kolla, ndjesi jo e mirë në frymëmarrje apo rëndesë në gjoks, me patjetër ekzaminim klinik dhe jo më vizitë nga telefoni”, tha ai.