Të shtëna me armë zjarri janë raportuar të shtunën pasdite në Brugg AG, Zvicër, ku si pasojë ka mbetur i plagosur një 31-vjeçar nga Kosova. Sipas raportimeve, një veturë BMV ka hapur zjarr ndaj një makine Skoda të parkuar në një zonë parkimi.
Në Skoda ndodheshin dy persona, mes tyre edhe 31-vjeçari kosovar, i cili u plagos dhe u transportua menjëherë në Spitalin Kantonal në Baden për trajtim mjekësor. Menjëherë pas ngjarjes, zona u rrethua dhe u vu nën masa të rrepta sigurie nga forcat policore.
Autoritetet lokale njoftuan se kanë identifikuar si të dyshuar kryesor një 24-vjeçar zviceran, i cili u ndalua gjatë të njëjtës ditë së bashku me një shtetas tjetër kosovar. Të dy janë marrë në ndalim të përkohshëm.
Ende nuk janë dhënë detaje të tjera mbi moshën e të dyshuarit të dytë apo nëse të dy ndodheshin në automjetin BMV në momentin e të shtënave. Ndërkohë, janë nisur procedurat penale dhe hetimet po vijojnë për të zbardhur plotësisht rrethanat e ngjarjes.