Ambasada e Rusisë në Tiranë ka reaguar në lidhje me bisedën telefonike mes ministrit të Jashtëm, Sergei Lavrov dhe kryeministrit Rama në cilësinë e kreut të OSBE-së.
Sipas një njoftimi në Facebook nga ambasada, Rusia ka kërkuar që Bjellorusisë të mos i imponohet asgjë nga jashtë, për të shmangur përvoja të trishta.
‘Më 20 gusht, me iniciativën e palës shqiptare, u zhvillua një bisedë telefonike midis Ministrit të Punëve të Jashtme të Federatës Ruse, Sergej Lavrov dhe Kryeministrit të Shqipërisë, Kryetarit të OSBE-së, Edi Rama.
Palët diskutuan mbi situatën në Bjellorusi në kontekstin e propozimeve të Kryesisë Shqiptare të OSBE-së për të kontribuuar në zhvillimin e dialogut midis autoriteteve dhe opozitës.
Ministri Lavrov vuri në dukje se është e nevojshme që bjellorusët të lejohen të zgjidhin vetë punët e tyre, të mos ketë ndërhyrje në dialogun midis autoriteteve dhe shoqërisë dhe t`u mos u imponohet shtetasve bjellorusë asgjë nga jashtë, në mënyrë që të shmanget përvoja e trishtë e “ndërmjetësimit evropian” në Ukrainë në shkurt 2014.
Bashkëbiseduesit rikonfirmuan rolin e rëndësishëm të Misionit Special të Monitorimit të OSBE-së në përpjekjet për të zgjidhur konfliktin e brendshëm ukrainas, duke përfshirë nevojën për të përgatitur raporte objektive për atë që po ndodh në të dyja anët e linjës së kontaktit në Donbas’, thuhet në reagimin e ambasadës së Rusisë në Tiranë.
https://www.facebook.com/RusEmbassyAlbania/photos/a.721220384638411/3255495911210833/?type=3