“The Economist“
Cigaret elektronike kanë tërhequr vëmendjen e madhe të qeverisë amerikane vitet e fundit. Në vitin 2019, Urdhri i Kirurgëve të SHBA-ve e cilësoi përdorimin e cigares elektronike si një epidemi mes të rinjve në vend duke kritikuar veçanërisht produktet me shije “të përshtatshme për fëmijët”, si kanella dhe vanilja.
Po atë vit, më shumë se 450 njerëz në Amerikë vuajtën nga një sëmundje misterioze dhe e rëndë e mushkërive që ishte e lidhur me cigaren elektronike dhe ndoshta ishte shkaktuar nga përmbajtje të shitura në tregun e zi që përmbanin ekstrakte kanabisi dhe substanca të dëmshme si vaji i vitaminës E. Vende të tjera, duke përfshirë Brazilin, Indinë dhe Singaporin, kanë ndaluar tashmë cigaret elektronike.
Sa të këqija janë në të vërtetë cigaret elektronike?
Pajisjet përdorin një ngarkesë elektrike për të avulluar një dozë nikotine (të shoqëruar, shpesh, nga kimikate të ndryshme aromatizuese). Përbërja e avullit ndryshon midis markave. Përbërësit kryesorë të tij – propilen glikol dhe glicerol – mendohet se janë kryesisht të padëmshëm kur thithen.
Por kjo nuk është e sigurt.
Nitrozaminat, një familje kimikatesh kancerogjene, janë gjetur në avujt e cigareve elektronike.
Grimcat metalike nga elementi ngrohës i pajisjes, si nikeli dhe kadmiumi, janë gjithashtu një shqetësim.
Ekspozimi i lartë ndaj këtyre mund të rrisë rrezikun e kancerit.
Dhe disa studime kanë zbuluar se avulli mund të përmbajë nivele të larta të kimikateve si formaldehidi, acetaldehidi dhe akroleina, të gjitha që rrjedhin nga përbërës të tjerë që janë ekspozuar ndaj temperaturave të larta.
Ai gjithashtu përmban radikale të lira, substanca shumë oksiduese që mund të dëmtojnë indet ose ADN-në dhe që mendohet se vijnë kryesisht nga aromatizuesit.
Pastaj është nikotina.
Përveçse krijon varësi dihet se ka një efekt negativ në të gjithë trupin.
Shqetësimi kryesor janë efektet e saj te fëmijët. Studimet tregojnë se ekspozimi ndaj nikotinës në moshë të hershme mund t’i bëjë përdoruesit më të ndjeshëm gjatë jetës ndaj substancave të tjera që krijojnë varësi.