Jasir Asani ka shënuar shumë gola në kampionat dhe Champions League e Azisë. Kjo e ndihmon të jetë gati 100% për Kombëtaren para një ndeshje tepër të rëndësishme si ajo ndaj Çekisë sonte në mbrëmje për në Ligën e Kombeve.
”Po kaloj një formë shumë të mirë tek ekipi, çdo stërvitje, çdo ndeshje po bëj maksimumin që të jemi në formë më të mirë për Kombëtaren. Nuk ka rëndësi kush shënon unë, sulmuesët e tjerë, apo mesfushorët, por të shënojmë dhe të marrim 3 pikët”,-tha Asani.
Në një intervistë për ”TV Klan”, tha se do të jetë një plus për ekipin që do të luajë në shtëpi ndeshjet e fundit, ku ka mbështetjen e tifozëve, të cilët krijojnë një atmosferë elektrizuese nga fillimi deri në fund.
”Do të jetë stadium plot me tifozë dhe duhet të vijnë që të na mbështesin, pasi na duhet mbështetja e tyre. Tifozët meritojnë çdo gjë, fitore çdo ndeshje. Nëse futemi me mentalitet fituesi dhe të jemi të gjithë bashkë, besoj se do t’ia dalim. Kemi një Kombëtare shumë të fortë sidomos në shtëpi jemi shumë të fortë”.