Zbardhen detaje të reja në lidhje me shpërthimin e ndodhur në mesnatë në Tiranë.
Shpërthimi ka ndodhur rreth mesnatës në katin e 9-të të një apartamenti në rrugën ‘Sadik Petrela’ në Tiranë.
Lënda plasëse dyshohet të jetë dërguar me dron deri në ballkonin e banesës, që rezulton në emër të Albert Thomas, por që ia ka lëshuar me qira Elena Arzas.
Grupi i hetimit nuk e ka marrë ende atë në pyetje, pasi në banesë nuk kishte njeri. Përveç pistës që lënda plasëse mund të jetë hedhur me dron, grupi i hetimit nuk përjashton as mundësin e një inskenimi.
Policia nuk ka ende të qartë se kush mund të ketë qenë objektivi, pronari i banesës apo vajza që ia kishte lënë me qira.
Informacion paraprak
Rreth orës 23:45, të datës 21.12.2024, është njoftuar Salla Operative se në banesën që jetonte shtetasja E.A, në rrugën ‘Sadik Petrela’ në katin e 9-të, është dëgjuar një zhurmë si shpërthim.
Menjëherë kanë shkuar shërbimet e Policisë ku kanë hapur me forcë derën pasi nuk kishte njëri në banesë dhe kanë konstatuar në ballkonin e kësaj banese, të dëmtuar xhamin dhe vetratën e ballkonit, që dyshohet se janë dëmtuar nga lëndë plasëse.
Grupi hetimor, në drejtimin e Prokurorisë, vijon punën për zbardhjen e rrethanave të rastit, si dhe për identifikimin e kapjen e autorit/ëve.
Materialet procedurale u referuan Prokurorisë për veprime të mëtejshme.