Në redaksinë e emisionit investigativ “Stop” në Tv Klan është drejtuar nëna e një djali maturant që kur aplikoi për shkollë të lartë, një vit pasi kishte përfunduar Maturën, rezultoi pa mesatare. Kur problemi u bë prezent, të dhënat hidhen sërish, por mesatarja doli 1. Si përfundim, djali humbi të drejtën për shkollë të lartë.
Denoncuesja: Jam nëna e një maturanti të vitit 2021-2022. Ai vjet nuk e vazhdoi shkollën për arsye familjare. Sivjet, aplikoi në datën 4 Tetor, bëri dhe pagesën e postës dhe të gjitha në rregull. Nuk mundi dot të futej tek U-albania për përzgjedhjen e lëndëve. Në shtëpi nuk i hapej nga kompjuteri. Shkova tek shkolla. Nga kompjuteri i zyshës, Eda Zari që merret me këtë përgjegjësi, doli që ishte pa mesatare fare. Kjo e penalizonte që të aplikonte në shkollë. Zysha më drejtori tek zyrat e ZVAT-it në Tiranë, shkoj atje, zonja e konfirmoi që aplikimi ishte shumë në rregull. Urdhëroi drejtoreshën dhe zyshën përgjegjëse ta zgjidhin këtë punë. Me besim më thanë që do ta zgjidhin dhe unë i besova. Më thanë që tani ka të drejtë çuni që ta aplikojë dhe të shkojë në shkollë. Shkoj tek universiteti i Gjuhëve të Huaja, atje më del që mesatarja e çunit ishte nota 1-sh. Erdha prapë tek shkolla, më thanë që do ta rregullojmë e do të bëjmë të pamundurën, nuk do ta lëmë djalin pa shkollë, por asgjë. Djali është i penalizuar tani dhe ato për këtë punë, e heqin fajin nga vetja e tyre dhe thonë “jo po QSHA-ja, jo po ZVAT-it”, ndërkohë që kam bërë kërkesat dhe kam folur dhe asnjë nuk më jep zgjidhje.
“Stop” i është drejtuar ZVA Tiranë, ku është thënë se Komisioni i Maturës Shtetërore merret me këtë dhe problemi duhet të ishte zgjidhur në kohën e duhur. Më pas, gazetarja takoi përgjegjësen e Maturës në gjimnazin “Ismail Qemali”, por Eda Zara, mohoi të kishte gabuar.
Gazetarja: Kemi marrë konfirmimin nga Zyra Arsimore që të dhënat janë hedhur gabim. Ju çfarë përgjegjësie mbani?
Mësuesja: Është e gabuar kjo pjesë.
Gazetarja: Si hidhet mesatarja 1?
Mësuesja: Të dhënat janë korrekte. Detyra ime është të hedh vetëm notat e këtij nxënësi, të cilat me korrektësi janë hedhur në sistem. Çdo procedurë tjetër është ndjekur sipas udhëzimeve të dhëna nga Drejtoria Arsimore. Nëse ju doni fakte apo ku di unë…
Gazetarja: Për cilin vit të Maturës e keni hedhur?
Mësuesja: Atëherë kur ka mbaruar.
Gazetarja: Kur ka mbaruar?
Mësuesja: 2021-2022.
Gazetarja: Pikërisht, ky është gabimi.
Mësuesja: Jo, tek pjesa e hedhjes së notave është që ky duhet të hidhet nota aty ku ka mbaruar. I am hedhur në 2021-2022, atëherë kur ai ka mbaruar.
Gazetarja: Si ka mundësi? Se ju thoni kështu, ndërkohë që mesatarja i ka dalë 1?
Mësuesja: Atëherë gjejeni.
Gazetarja: Ju jeni menaxhuesja e Maturës?
Mësuesja: Unë jam menaxhuese për hedhjen e notave. Unë hedh vetëm notat. Procedura ime është hedhja e notave.
Gazetarja: Çfarë përgjigjeje i keni kthyer prindit të këtij nxënësi?
Mësuesja: Prindit të tij i kam thënë që notat janë në sistem dhe se do të komunikojmë me Zyrën Arsimore. Kam komunikuar dhe vazhdoj të komunikoj dhe nuk kam marrë një zgjidhje, pres një zgjidhje.
Faji edhe njëherë ka mbetur jetim, por një i ri është sot pa shkollë për të dytin vit./tvklan