Një shqiptar, i cili përdori pseudonimin e “Tony Montana”, një nga karakteret e filmit “Scarface” të Al Paçino, është shpallur fajtor për vrasjen e tij të pestë.
Mane Driza është shpallur fajtor për vrasjen e Stefan Bledar Mone në një banesë në veri të Londrës në qershor 1999.
Mone i cili priste të bëhet baba, mbeti i vdekur me 120 plagë pas një sulmi “brutal dhe të pamëshirshëm” me thikë.
Driza, tani 41 vjeç, u arratis më pas për një periudhë trevjeçare në Evropë, ndërsa ditën e djeshme siç shkruan BBC, gjykata e Old Bailey e shpalli atë fajtor .
Driza, 21 vjeç në atë kohë (1999), u tha shokëve të punës në Watford se donte të vriste bashkëkombësin e tij shqiptar, madje duke i kërkuar njërit prej tyre që ta shoqëronte të blinte një thikë.
Prokuroria tha se një thikë biçak, një thikë djathi dhe një kazmë e vogël u përdorën për vrasje.
Miku i viktimës, Zoe Blay, u përball me një “skenë të tmerrshme” kur e gjeti trupin e tij të nesërmen dhe ishte në gjendje ta identifikonte të ndjerin vetëm nëpërmjet rripit që mbante.
‘Vrasje në zemrën e tij’
Vrasja erdhi dy vjet pasi Driza, i cili gjithashtu përdorte emrin Sokol Drenova, vrau një burrë dhe djalin e tij në një fshat të Shqipërisë dhe iku në Britani nëpërmjet një emrin tjetër, shkruan BBC.
Ai arriti atje në gusht të vitit 1997, duke pretenduar se ishte një 17 vjeçar i ikur nga Kosova.
Pas vrasjes së z. Mone – viktima e tij e tretë – ai iku në Itali, ku qëlloi dhe vrau dy burra në një bar në Catania, gjashtë muaj më vonë. Ai u përpoq të vriste një burrë të tretë në bar.
Në vitin 2001, në Shqipëri, Driza u dënua në mungesë për “vrasje me paramendim” së bashku me të atin.
Në qershor 2002, ai u dënua në Sicili për vrasjen e shqiptarëve Artan Maskaj dhe Albert Blushaj, si dhe vrasjen në tentativë të Lefter Maskajt.
Përfundimisht, më 31 maj të vitit të kaluar, Driza u ekstradua në Britani të Madhe.
Vendimi përfundimtar për vrasjen në Britani pritet të jepet më 3 prill dhe siç shkruajnë mediat britanike, Driza pritet të dënohet me burgim të përjetshëm.