Sot mbushen plot 19 vjet nga tragjedia e 9 janarit të 2004 në Karaburun, ku 21 persona humbën jetën si pasojë e avarisë në motorin e gomones që u nis nga Vlora. Ata ishin nisur drejt Italisë, ndërkohë që mes të vdekurve ishte edhe një skafist. Familjarët e viktimave kërkojnë të zbardhet ngjarja, ndërkohë që drejtësinë e kërkojnë edhe nga SPAK.
Nikoll Mëhillaj, kryetar i shoqatës “9 janari” tha në një intervistë për Euronews Albania se familjarët e viktimave të tragjedisë kanë prova që vërtetojnë se ish-drejtori i policisë së shtetit në 2004, Bajram Ibraj nuk ka ndërhyrë për të shpëtuar gomonen pasi ishte i përfshirë në trafik.
“Bajram Ibraj ka thënë në atë kohë se e kanë bërë operacionin e kërkim-shpëtimit. Kur i ka bërë letër Moisiu, në atë kohë president dhe i ka kërkuar sqarime për tragjedinë, i ka thëne se nuk e kemi bërë operacionin se s’kemi pasur mjete dhe forca, janë me dokumente këto. Kam shumë fakte se Ibraj ka dashur t’i lërë të vdesin aty që të fundosej ajo gomone për të fshehur poshtërsitë që ka bërë. Janë të gjitha faktet që Ibraj i ka lënë të vdesin me qëllim”, u shpreh Mëhillaj.