Një ngjarje e rëndë ka tronditur komunitetin shqiptar në Mbretërinë e Bashkuar, pasi një 28-vjeçar shqiptar ka humbur jetën pasi u gjet i plagosur rëndë në një rrugë të qytetit të Leicesterit.
Viktima është identifikuar nga autoritetet britanike si Ervin Lita, i njohur edhe me emrin Ervin Axhami. Sipas policisë, shërbimi i ambulancës East Midlands Ambulance Service njoftoi autoritetet rreth orës 06:58 të mëngjesit të së dielës, pasi i riu u gjet i shtrirë me plagë të rënda në Compton Road.
Pavarësisht ndërhyrjes së ekipeve të emergjencës dhe përpjekjeve për t’i dhënë ndihmën e parë, 28-vjeçari nuk mundi të mbijetonte dhe u shpall i vdekur në vendngjarje.
Policia e Leicesterit ka nisur hetimet për zbardhjen e plotë të rrethanave të ngjarjes. Deri tani, dy persona, 36 dhe 27 vjeç, janë arrestuar nën dyshimin për vrasje.
Autoritetet kanë bërë të ditur se të dy të dyshuarit janë liruar me kusht, ndërsa hetimet vijojnë për të zbardhur dinamikën dhe motivet e ngjarjes.