Ambasadori Bashkimit Europian Silvio Gonzato ishte sot në bashkinë e Matit për të inauguruar përfundimin e punimeve në Pallatin e Kulturës “Shefqet Doda Doda” Burrel.
Në takimin e organizuar në këtë njësi vendore ambasadori i BE-së u njoh nga kryebashkiaku Agron Malaj me historinë, kulturën, traditat, turizmin, infrastrukturën, arsimin, shëndetësinë e gjithçka tjetër që lidhet me këtë trevë.
Ai u njoh me rezultatet konkrete të projektit “Inovacioni dhe Kultura për të fuqizuar Matin” – ICTe Mat, financuar nga Bashkimi Evropian nëpërmjet skemës së granteve “BE për Bashkitë”.
“Pallati i Kulturës “Shefqet Doda” për ne matjanët ka një rëndësi të madhe pasi përmes tij kanë kaluar breza të tërë të rinjsh dhe të rejash, burra dhe gra që i kanë dhënë shumë Matit në çdo fushë. Por, kjo ndërhyrje nuk është e rëndësishme vetëm për rivitalizinin arkitektonik, por mbi të gjitha është një hap i rëndësishëm drejt përqafimit të së ardhmes së teknologjisë.”, theksoi në takimin e organizuar kryetari i Bashkisë Mat Agron Malaj.
Projekti ka në fokus jo vetëm rikonstruksionin e Pallatit të Kulturës, por edhe kthimin e tij në një Qendër teknologjike ku të rinjtë e apasionuar pas teknologjisë do të kenë mundësi të zhvillojnë dhe përmirësojnë talentet dhe aftësitë e tyre në Teknologji nëpërmjet 3 programeve që ofron kjo qendër: Sratch, Robotikë dhe Dizajn 3D.
Malaj shtoi se: “Nëpërmjet aktiviteteve, trajnimeve dhe ëorkshopeve të zhvilluara janë impaktuar drejtpërdrejt një numër i madh personash, të cilët janë informuar jo vetëm mbi projektin por edhe mbi Bashkimin Evropian duke rritur kapacitetet në menaxhimin e fondeve të huaja. Rivitalizimi i Pallatit të Kulturës do të rigjallërojë jetën kulturore të zonës dhe do të sjellë qasje moderne dhe novatore në funksionin e saj të përditshëm.” ky është projekti i dytë i financuar nga Bashkimi Evropian, i zbatuar në Bashkinë Mat.
Projekti Mat YESi i cili kishte gjithashtu në fokus rininë dhe mbajtjen e tyre larg drogërave dhe aktiviteteve të paligjshme nëpërmjet krijimit të një Qendre kursesh profesionale duke ju ofruar atyre më shumë mundësi për tregun e punës.
Ambasadori i BE-së Silvio Gonzato tha se ky investim nuk është vetëm për ndërtesën, por dhe për kulturën e një vendi. Gonzato shtoi se BE ka vendosur të investojë jo vetëm në Tiranë, por edhe në bashkitë e tjera të vendit. “Të tjera investime do të ketë edhe në Bashkinë e Matit” përfundoi Gonzato.
Drejtoresha e Shoqatës për Autonomi Vendore Adelina Farrici nënvizoi se vizita e ambasadorit të BE-së në Burreli dhe përfundimi i këtij investimi është një ditë e veçantë për qytetarët e Matit.
“Investimi, tha Farrici, ishte i shumëkërkuar dhe i domosdoshëm për qytetarët e kësaj treve. Zbatimi i tij me sukses faktoi se edhe kjo bashki ka kapacitete dhe mundësi të realizojë projekte të BE-së. Këtu gërshëtohen mjaft mirë grup-moshat si dhe tradita me modernen.”
