Presidenti i Shteteve të Bashkuara, Donald Trump, ka reaguar ashpër ndaj Bashkimit Evropian, duke e akuzuar se po godet padrejtësisht kompanitë e mëdha amerikane me gjoba miliardëshe.
Në një postim në platformën Truth Social, Trump kritikoi vendimin e fundit të BE-së për të gjobitur Google me 1 miliard dollarë, duke theksuar se vlera totale e gjobave ndaj kompanisë ka kaluar 18 miliardë dollarë. Ai përmendi gjithashtu gjobat e vendosura ndaj Apple, Meta dhe Amazon, duke i cilësuar ato si të padrejta.
“Shtetet e Bashkuara nuk janë ‘arkë kursimesh’ e Evropës dhe nuk do ta lejojmë të jenë”, shkroi Trump.
Presidenti amerikan deklaroi se administrata e tij do të nisë një hetim sipas Seksionit 301 për atë që e konsideron një praktikë të padrejtë ndaj kompanive amerikane, ndërsa paralajmëroi se Bashkimi Evropian do të përballet me tarifa të reja.
Sipas Trump, këto gjoba janë të paligjshme dhe joetike, ndërsa u shpreh se administrata e tij do të punojë për anulimin e tyre dhe për vendosjen e masave tregtare ndaj BE-së “sa më shpejt të jetë e mundur”.