Dy komandantë që mbronin fabrikën e çelikut Azovstal në qytetin port të rrethuar të Mariupolit janë transferuar në Rusi për hetim, siç ka raportuar agjencia ruse e lajmeve TASS.
Duke cituar një burim të paidentifikuar rus të zbatimit të ligjit, TASS tha se zëvendëskomandanti i batalionit Azov dhe komandanti i brigadës së 36-të detare të forcave të armatosura të Ukrainës, ishin zhvendosur në Rusi.
“Oficerët e tjerë të njësive të ndryshme ukrainase u transportuan gjithashtu në Rusi”, sipas një burimi.
Muajin e kaluar, Rusia pretendoi se më shumë se 250 luftëtarë ukrainas që ishin të ngujuar në fabrikën e çelikut ishin dorëzuar.
Zëdhënësi i Kremlinit Dmitry Peskov tha se Vladimir Putin kishte garantuar se luftëtarët ukrainas do të trajtoheshin “në përputhje me standardet ndërkombëtare”.
Zëvendësministrja e Mbrojtjes e Ukrainës, Hanna Malyar, tha se ata që kishin nevojë për trajtim mjekësor u dërguan në një spital në qytetin e kontrolluar nga Rusia të Novoazovsk, rreth 30 milje në lindje të Mariupolit.
Të tjerët po dërgoheshin në Olenivka përmes korridoreve humanitare.
Megjithatë, pasiguria ka rrethuar fatin e luftëtarëve të kapur nga forcat ruse.
Azov, një njësi ushtarake këmbësorie tërësisht vullnetare e cila u formua në vitin 2014 si një milici vullnetare e ekstremit të djathtë për të luftuar separatistët e mbështetur nga Rusia dhe njësia e brigadës së 36-të të marinës, kishte një rol kyç në mbrojtjen e fabrikës së çelikut.