Policia e Elbasanit ka vënë në pranga një 37-vjeçar me detyrë teknik laboratori në spitalin e Elbasanit, pasi iu mori para një çifti bashkëshortësh, me pretendimin se do t’iu siguronte pension të invaliditetit, në kundërshtim me ligjin.
Nga të dhënat paraprake bëhet me dije se, pas kallëzimit të dy bashkëshortëve për një rast korrupsioni, policia ka ndërhyrë menjëherë duke arrestuar shtetasin me iniciale E.P, banues në Elbasan.
37-vjeçari iu ka marrë çiftit të bashkëshortëve shumën 100 mijë lekë, me pretendimin se do t’iu siguronte në kundërshtim me ligjin dokumentacionin e nevojshëm për përfitimin e pensionit të invaliditetit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme, për veprën penale “Korrupsioni pasiv i personave që ushtrojnë funksione publike”.