Ish-mesfushori i Kombëtares, Klodian Duro, është kthyer pas në kohë, teksa ka ndarë me ndjekësit e tij në rrjetet sociale dy foto nga e kaluara. Njëra i përket viteve të para të karrierës si futbollist, ndërkohë që tjetra është nga dueli me Ronaldinjon, në testin miqësor Shqipëri – Milan, përfunduar 3-3 dhe që shihte Klodian Duron kapiten të ekipit.
Nëpërmjet një statusi në rrjetet sociale, Duro ka treguar se është bullizuar deri në moshën 18 vjeçare, kur debutoi me ekipin e parë. Askush nuk besonte te fiziku i tij, ndërsa elbasanasi nuk dorëzohej me besimin se një ditë do të ishte numri 10 më i mirë në histori.
Ky është dhe mesazhi që 46-vjeçari kërkon të përcjellë në fund. Duro e mbyll duke thënë që të mos dorëzoheni kurrë, pavarësisht çfarë thonë të tjerët.
Postimi:
“Me topin luan shumë mirë, megjithatë, shpesh herë është përplasur me kritika të ashpra. Disa e kanë përshkruar si të shkurtër, të dobët, të vogël, pa fuqi, pa forcë, dhe pa rezistencë. Një kohë të gjatë, këto fjalë i degjoja çdo ditë, nga mosha 8 vjeç deri në 18 vjeç, derisa erdhi dita e ndeshjes time të parë me Elbasanin.
U rrita duke përballuar bullizmin e vazhdueshëm nga të tjerët, por gjithashtu duke punuar palodhur çdo ditë, duke mos humbur kurrë besimin tek vetja. Kjo punë dhe përpjekje më dhanë forcën për të përballuar sfidat. Dhe ajo ditë kur u bëra pjesë e ndeshjes me Elbasanin, më dha një mundësi të madhe për të treguar vlerat e mia.
Në rrugën time drejt suksesit, kam mesuar se njerëzit mund të thonë shumë për ne, por ajo që ka rëndësi vërtet është se si ne e shohim veten dhe se çfarë bëjmë për të arritur qëllimet tona. Edhe pse mund të përballeni me kritika dhe bullizëm, mos u dorezoni kurrë. Besoni në veten tuaj dhe punoni palodhur për të arritur ëndrrat tuaja. Mos harroni, asnjë fjalë negative nuk mund të ndalë një zemër të vendosur për të arritur suksesin.”