Kadastra e Tiranës është zhvendosur në tjetër ambient pasi ekspertët e aktit të konstatimit e shpallën godinën të pabanueshme. Aktualisht dosjet e pesë drejtorive janë duke u transportuar në ambientet e godinës private të Tirana Bussines Park.
Nuk dihet ende se si do të ofrohen shërbimet ndaj qytetarëve, në një kohë që zhvendosja bëhet larg Tiranës, rrugës për në Rinas.
Burime për tirananews.al bëjnë të ditur se kadastra do të paguajë 8 euro në muaj për m2, dhe ka marrë me qira rreth 4 mijë m2 ambiente, duke paguar kështu në muaj 32 mijë euro. Por çfarë qëndron pas kësaj qiraje?
Mësohet se kompania ka vendosur të strehojë 500 persona të pastrehë të prekur nga tërmeti i 26 nëntorit, me kusht që kadastra të marrë me qira ambientet e saj. Ky proces tashmë ka nisur teksa nuk ka ende një sqarim për qytetarët se si do i marrin këto shërbime.