49-vjeçarja greke që u sulmua me acid muajin e kaluar nga ish-bashkëshorti i saj, ka dhënë një intervistë për mediat vendase, ku ka treguar momentet e tmerrit.
Kristina, nënë e gjashtë fëmijëve, deklaroi se nuk e dinte që burri i maskuar me kapuç ishte ish-burri i saj.
“Ndërsa po shkoja në punë, në errësirë, një burrë doli nga hiçi dhe më sulmoi. Nga sa kuptova, kishte diçka në duar, si një leckë të njomur me ndonjë lëng dhe u përpoq të më mbyllte gojën, nuk e lashë që t’ia dilte, luftova me të për 8 deri në 10 minuta”.
“Po bërtisja nga dhimbja, thirra për ndihmë, menjëherë vrapova në dyqan për të larë fytyrën me ujë. Kisha shumë dhimbje, digjesha, sikur më kishin vënë flakën, kisha dhimbje të tmerrshme.”
Ajo tregoi se në këto momente telefonoi punëdhënësin për t’i kërkuar ndihmë.
“E kisha celularin në duar dhe më pas telefonova punëdhënësin tim, ai më dëgjonte duke bërtitur, thjesht nuk e dinte se ku isha dhe çfarë po ndodhte. Me sa duket ish-bashkëshorti im ishte inatosur dhe kur më ka tërhequr nga flokët më ka hedhur në fytyrë acid të lëngshëm.”
50-vjeçari, i cili pranoi autorësinë e krimit, u kap nga policia në spitalin ku ish-bashkëshortja e tij po merrte mjekim.